दाङमा बसको ठक्करबाट विद्यार्थीको मृत्यु, उत्पन्न तनावले प्रहरीको गाडी तोडफोड

दाङ- दाङको तुलसीपुरबाट घोराही तर्फ जाँदै गरेको यात्रु बहाक बसको ठक्करबाट एक विद्यार्थीको मृत्यु भएको छ । सोमबार दिउँसो ४ बजेको समयमा तुलसीपुरबाट घोराही तर्फ जाँदै गरेको भे १ ख ३६९७ नं.को बसको ठक्करबाट दुधरास स्कुलमा कक्षा ३ मा अध्ययनरत ८ वर्षीय उत्तम चौधरीको घटना स्थलमै मृत्यु भएको छ ।

दुर्घटनापछि आक्रोशित स्थानीयले प्रहरीको गाडीमा तोडफोड गरेका छन्। प्रहरीले मृतक बालकको शव उठाउन खोजेको भन्दै स्थानीय आक्रोशित बनेका हुन्।
‘घोराहीस्थित जिल्ला अदालतमा बयान र म्याद थपका लागि लगिएका थुनावाहरू लिएर फर्किँदै गरेको हाम्रो गाडीमा तोडफोड र ढुंगामुढा भएको छ,’ एक प्रहरी अधिकारीले भने, ‘स्थिति नियन्त्रणमा लिन प्रयास भइरहेको छ।’

तुलसीपुर १७ घर भएका बालकलाई स्कुलबाट घर फर्किने क्रममा स्कुल अगाडी गाडीको बायाँ चक्का किचेको थियो । अहिले घोराही तुलसीपर सडक खण्ड अवरुद्ध भएको छ । विद्यार्थी अभिभावकहरु अहिले नाराबाजीसहित ठक्कर दिने गाडी तोडफोड गरेका छन् ।